एक साधी गजल.. - ज्ञानेश वाकुडकर
- 17/04/2021 Saturday 10:29 am
Business
एक साधी गजल, जन्म जावा भरून
अन् तुझ्यासारखे जग असावे तरुण !
एक साधी गजल, जन्म जावा भरून
अन् तुझ्यासारखे जग असावे तरुण !
ह्या सरी बोलल्या थेट बरसायचे..
ढग अचानक कुणी बंद केले वरून ?
याद विरहातली बोचते केवढी
पाहिली का कधी सांग हाती धरून ?
का नवी भांडणे रोज करतेस तू..
त्या जुन्या पावत्या वापरून वापरून ?
शब्द पाळायला सांग ओठासही
जन्म झाले किती, भेटण्याचे ठरून ?
पेरण्याची तुला हौस नाही म्हणे..
शेत का ठेवले, हे असे नांगरून !
देवळांचे नवे टोल नाके नको..
चल तुझे काम कर, माणसाच्या घरून !
मी पुन्हा जन्म का घ्यायचा सांग ना
जे कराया हवे, सर्व झाले करून !
ही मिठी वेगळी, ती मिठी वेगळी..
थेट आकाशही पाहते थरथरुन !
-
ज्ञानेश वाकुडकर
नागपूर १७/०४/२०२१